Асел Калканова Бишкектеги элдик көркөм кол өнөрчүлүк окуу жайын бүтүргөн. Ошол окуу жайында чебер-мугалим болуп эмгектенет. Уздук таасирди Жапарова Макенден алган. Анын көркөм оюм-көчөттөрү менен белек-бечкектик үлгүлөрдү жасоого машыккан. Асел айым «илме сайманы» (шибеге сайма) учуктуу ичке ийне аркылуу жүзөгө ашырат. «Илме дос саймасы», «чыраш саймасы», «басма саймасы» менен бүткөрүлгөн көркөм буюмдары бар. Анын андай үлгүлөрү сатууга дүкөндөргө чыгарылат, белек-бечкекке жөнөтүлөт. Аселдин чыгармачылыгы чакан туштуктарды, изденүү менен пайда болгон композициялык чыгармаларды түзүүгө шартташкан. Ал «Манас 1000ге» карата чырмак буюмдарынын серияларын жараткан.

Эскерте кетсек, көргөзмө Кыргыз-Түрк «Манас»  университетинде коммуникация факультетинин 1-кабатында 17-майга чейин уланат.

Жазган: Бейшенбекова Адиля