Окуу жайдын кызматкерлеринин балдарына жаңыжылдык майрам тартууланды. 

28-декабрда Ч.Айтматов атындагы студенттик шаарчада жайгашкан маданият борборунда өткөн Жаңы жылдык балаты майрамына университеттин кызматкерлеринин 1 жаштан 10 жашка чейинки балдары чакырылып, аларга жаңы жылдык майрам тартууланды. Иш-чара университеттин ректору, профессор Себахаттин Балжы жана биринчи проректор, профессор Асылбек Кулмырзаевдин катышуусунда өттү.

Аяз Ата менен Аяз кыз кечени ачып берген соң, ректор, профессор Себахаттин Балжы жана биринчи проректор, профессор Асылбек Кулмырзаевге сѳз берилди. Анда окуу жай жетекчилери, университеттин ийгиликтерине токтолуп, кирип келе жаткан 2019-жаңы жыл жакшылыктарды, ийгиликтерди алып келсин, элибизде, жерибизде тынчтык жана ар бир үй-бүлѳдѳ береке, бакыт, ырыскы, молчулук, токчулук болсун деген тилектерин айтышты.

Балдар үчүн уюштурулган жаңы жылдык майрам атайын театралдаштырылган оюн-зоок жана чакан концерттик программа менен коштолду.