Дүйнөлүк Түрк ишкердик кеңешинин Евразия аймактык комитетинин делегация өкүлдөрү Кыргыз-Түрк “Манас” университетинин жетекчилиги менен жолугушту.

Ректор, профессор Себахаттин Балжы келген конокторго окуу жай тууралуу маалымат берип, өлкөнүн экономикалык жактан өнүгүүсүнө билим тармагы чоң түрткү болорун баса белгиледи. Ошондой эле ректор Манас университетинин ишкердик дүйнөсүнө тиешелүү көптөгөн кызматташтык мүмкүнчүлүктөрү бар экенин жана мындай эки тараптуу кызматташуулар кызматташтыктын жаңы мүмкүнчүлүктөрүнө жол ачарын, эң башкысы студенттер билим алуу менен эле чектелбестен, бизнес чөйрөсүндө да тажрыйба топтоого шарт түзүлөт деген оюн билдирди.

Аталган кеңештин Евразия аймактык комитетинин төрагасы Али Галип Савашыр мырза ишкердик чөйрөсү билим берүү мекемелерине чоң маани берип келээрин, анын себеби бул тармакта талап кылынган адистер университеттен даярдалып, тарбияланышат деди.

Жолугушуунун алкагында делегация өкүлдөрү университет ортосунда кызматташууга кызыкдар экендиктерин билдиришип, кызматташтык тууралуу макулдашуу тууралуу пикир алышты.