Дал чейрек кылым мурун 31-августа элибиз азаттыкка чыккан. Андан бери кандай гана окуялар болбосун кыргыз эли башын өйдө кармап алдыга умтулуп бара жаткан учуру.

Бул күн биз үчүн ыйык майрамдардын бирине кирет. Ошол себептүү мамлекетибиздин эгемендүүлүгүнө байланыштуу өлкөнүн дээрлик бардык аймагында майрамдык иш-чаралар өткөрүлдү. Ал эми иш-чаралардын эң ириси, албетте, борбор шаардагы “Ала-Тоо” аянтында өттү.

Салтанат эртең мененки саат 10до өлкө башчы, өкмөт башчы жана министрлердин катышуусунда башталды. Алмазбек Атамбаев өзүнүн куттуктоо сөзүндө кыргыз эли 25 жылдын ичинде бир кылымдык жолду басып өткөнүн жана Кыргызстан мамлекет катары өзүнүн жолун таап кеткенин баса белгиледи. Расмий бөлүгү аскердик парад менен улантылды. Ага эки миңге жакын аскерлер жана офицерлер катышты, параддын экинчи бөлүгүндө болсо аянттан аскердик оор техникалар жана учактар учуп өттү.

Мындан тышкары бул иш-чаранын алкагында “Улуттук кийимдер фестивалы” Бишкек шаарындагы ЖОЖдордун студенттеринин катышуусунда болду. Андан соң шаар тургундары жана коноктору үчүн  майрамдык концерт уюштурулуп саат 23:00 дө аяктады.

Жазган: Кенешова Гулзира