2011-жылы билим берүүгө баштаган Кыргыз-Түрк “Манас” университетинин Теология факультети 28-майда алгачкы бүтүрүүчүлөрүн уядан учурду.

Манас университетинин ректору, профессор Себахаттин Балжы өлкө сыртында болгондугуна байланыштуу келе албай, анын ордуна видеокуттуктоосу көрсөтүлдү. Анда: “Окуу жайда алган билимиңер бүтүндөй өмүрүңөргө жарык чачкан шам чырак болуп берсин. Коомго ак дилден кызмат өтөгүлө”,- деп айтылат.

Бүтүрүү аземинде Манас университетинин биринчи проректору, профессор Асылбек Кулмырзаев совет мезгилинде динге тыюу салынганын, ал эми эгемендүүлүктү алган соң дин эркиндиги берилгенин айтып, учурда Кыргызстанда ислам динин туура эмес көрсөткөн күчтөр бар экендигине токтолду. Мындай шартта факультетибиздин алгачкы бүтүрүүчүлөрүндө чоң жүк турганын белгилеп, алар мыкты билими, адеп-ахлагы жана тарбиясы менен коомго чыныгы исламды көргөзүшү керектигин баса белгиледи.

Андан соң Теология факультетинин деканы, профессор Суат Жебежи студенттерди эң мыкты адеп-ахлак жана чыныгы илим-билимдин жолунда тарбиялаганга аракет жасашкандарын белгилеп, бүтүрүүчүлөрдү мындан ары да талыкпай билим алууга чакырды.

Ачылыш сөздөрүнөн соң окууну эң мыкты деген баага аяктап жаткан студенттерге сыйлыктар тапшырылды.

Радио-ТВ мүдүрлүгү

ММК жана коомчулук менен байланышуу бюросу