12-декабрь күнү алп жазуучунун туулган күнүнө карата КРнын Улуттук илимдер академиясында «Айтматов окуулары – 2016» эл аралык илимий-практикалык конференция өз ишин баштады. Конференция кыргыз элинин сыймыктуу уулу, залкар жазуучу, даанышман-ойчул, гуманист Чыңгыз Атйматовго жана «Ысык-Көл форумунун» 30 жылдыгына арналды. Конференцияга Казакстан, Өзбекстан, Кытай, Россия, Түркия жана башка мамлекеттерден окумуштуулар келишти. Конференциянын катышуучулары өз макала, баяндамаларында Чыӊгыз Айтматовдун көркөм жана публицистикалык чыгармаларын окуп-үйрөнүү, тереӊдетип изилдөө көп катмарлуу жана көп багыттуу иш экендигин белгилешти. Иш-чаранын алкагында «Айтматовдун асыл ой берметтери» жана «Вселенная сотворена с любовью» китебинин бет ачары да болду. XX кылымдын улуу жазуучусунун чыгармачылыгына арналган эл аралык илимий-практикалык конференция 13-декабрга чейин уланып, аягында резолюция кабыл алынат.

Ошол эле күнү Ч.Айтматов атындагы Кино үйүндө Тарых жана маданият жылынын алкагында Кыргыз киносунун 75 жылдыгына карата, Ч.Айтматовдун туулган күнүнө арналган «Айтматов жана кино» DVD жыйнагынын бет ачары болуп өттү. Иш-чарага Кыргызстан улуттук жазуучулар союзунун мүчөлөрү, коомдук ишмерлер, жазуучунун талантын баалаган окурмандар, үй-бүлөсү жана жакындары катышты.

Иш-чаранын алкагында Ч.Айтматовдун 40 жылдыгына арналып, 1968-жылы режиссер Изя Герштейн тарабынан тартылган «Чингиз Айтматов» аттуу тасма көрсөтүлдү.

Аталган DVD жыйнак КРнын Маданият, маалымат жана туризм министрлигине караштуу Кинематография департаментинин колдоосу менен чыгып, ага жазуучунун чыгармалары боюнча экрандаштырылган 8 фильм камтылган.