Бүгүн, 8-ноябрь күнү Коммуникация факультетинде Эл аралык  Дүйнө журналисттер федерациясынын колдоосу менен Стамбул шаарында биринчи жолу өткөн "Түрк дүйнөсүнүн даректүү тасмалар" фестивалында байгеге ээ болгон тасмалар көрсөтүлө баштады.

Иш-чарага университет жетекчилери, Эл аралык  Дүйнө журналисттер федерациясынын өкүлдөрү, КР ЖК өкүлдөрү, Кыргыз кинематография департаментинин, кыргыз киночуларынын жана медиа өкүлдөрү катышты.

Жыйынды алгач университеттин ректору, профессор Себахаттин Балжы ачып, «Көч» фильминин байгеге ээ болушу менен куттуктады. Ааламдашуу заманында кино тармагы маанилүү тармакка ээ болууда. Коммуникация факультетинин ишмердүүлүгүн ар дайым ар тараптан колдоп келебиз. Биздин тамырыбыз, тарыхыбыз, динибиз, дилибиз бир жана жалпы адамзаттык баалуулуктар тууралуу көптөгөн окшоштуктарыбыз бар ошол байланыштарды бекемдөө максатында Дүйнө журналисттер федерациясы маанилүү иштерди аткарып, Түрк дүйнөсүнүн байлыктарын таанытууда жакшы иштерди жасап келе жатканына кубанычтабыз. Мисалы, быйыл Стамбулда, Алма-Ата жана Бишкекте иш-чараларды өткөрүп, даректүү тасмаларды таанытууга салым кошуууда, - деди.

Биринчи проректор, профессор Асылбек Кулмырзаев өз сөзүн кыргыз керекметинин башталышынан баштап, «Көч» фильми биринчи эле эмес, буга чейин да бир топ сыйлыктарга ээ болгон. Келечеги кең болуп, мындан ары да чоң ийгиликтерге ээ болот деп ишенем. Убагында «Кыргыз кереметин» жаратуучулар азыркы күндө биздин окуу жайда эмгектенишип, артынан бир топ шакирттерди тарбиялап келе жатышат. Кино тармагы 90-жылдары экономикалык, социалдык маселелерге байланыштуу мурунку күчүн жоготуп койду, бирок азыр кайра жанданып келе жатканы байкалууда, - деп Түрк дүйнөсүндө кыргыз кинематографиясынын өз орду бар экенин баса белгиледи.

Ал эми Дүйнө журналисттер федерациясынын башчысы Мендерес Демир байгеге ээ болгон фильмдердин топтомун дүйнөгө таанытуу, даңазалоо максатын көздөп келе жатканын баса белгилеп, кыргыз эли талантка бай эл экенине ынандым. Таланттуу сценаристтер кино тармагында сонун чыгармаларды жаратышкан. Биздин  максат таланттуу адамдардын чыгармаларын таанытуу, андыктан келечекте Түрк дүйнөсүнө өз салымыбызды кошобуз, - деди.

Ошондой эле ЖК депутаты Садык Шер-Нияз бир кезде түрк элинин ичинен бүткүл дүйнөлүк илимге салымын кошкон мыкты инсандар чыккан. Алардын аты тарыхта калды. Түрк дүйнөсүнөн чыккан чыгармачыл адамдарды даңазалап, Стамбулда өткөн даректүү фильмдердин фестивалындай иш-чараларды дагы көбүрөөк өткөрүшүбүз керек. Ал эми бүгүнкү күнү Манас университетинен таланттуу жаштар чыгып, кыргыз киносунун өнүгүшүнө өз салымын кошууда. «Көч» фильми чынында мыкты тартылган тасма деп, жаштарга таланттуу агайлардан билим алып, келечекте түрк дүйнөсүнүн атын чыгара турган жаштардан болууга чакырды.

Кинематография департаментинин жетекчиси Мукталы Бектеналиев чындыгында эле 60-70-80-жылдары кыргыздарды дүйнөгө тааныткан кыргыз кинолору болгон. Кыргыз киносунун “Алтын доору” деп аталган ал мезгилде залкар жазуучубуз Чыңгыз Айтматов башында турган бир топ кыргыздын улуу инсандары Мелис Убукеев, Төлөмүш Океев, Болот Шамшиев, Геннадий Базаров болгонун эч ким тана албайт. Быйыл кыргыз киносунун 75 жылдыгынын алдында да мыкты киночулар өсүп келе жатат. Кыргыз кереметин жараткан орто муундагы инсандарыбыз учурда Манас университетинде кийинки таланттуу муундарды тарбиялап келе жатканын билебиз. Учурда окуу жайдын жаштары мыкты тасмаларды жаралып, дүйнөгө таанылып, кино тармагынын өнүгүшүнө өз салымын кошууда, - деп Улуттук кинематорграфиясынын өнүгүүсүнө кошкон салымы үчүн Коммуникация факультетинин ага окутуучулары Стамбулбек Мамбеталиев жана Каныбек ϴмүрбековду «Кыргыз киносунун отличниги» деген төш белгиси менен сыйлады.

Ал эми Коммуникация факультетинин деканы Хамза Чакыр иш-чаранын ачылышы менен куттуктап, жетекчиликке жана уюштуруучуларга ыраазычылык билдирди.

Иш-чаранын соңунда "Түрк дүйнөсүнүн даректүү тасмалар" фестивалында байгеге ээ болгон тасмалар көрсөтүлдү.

Эске салсак, бийик тоолор арасындагы топозчулардын турмушун чагылдырган “Көч” тасмасы буга чейин Казандагы мусулман кинолорунун фестивалында жана Катардын борбору Дохадагы даректүү тасмалардын эл аралык фестивалында баш байгени жеңип алган. 2012-жылы жергиликтүү “Ак илбирс” кино сыйлыгында “Эң мыкты тасма” деп табылган. Ал эми жакында Стамбул шаарында биринчи жолу өткөн "Түрк дүйнөсүнүн даректүү тасмалар" фестивалында баш байгеге ээ болгон. Аталган тасма, жалпысынан, 14 байгеге ээ болуп, эл аралык фестивалдарда 8 жолу баш байгени багындырган. Тасма 2011-жылы тартылып, Кыргыз-Түрк «Манас» университети тарабынан каржыланган.