Кыргызстандагы уюмдарга үзгүлтүксүз колдоо көрсөтүү иштери уланууда

2016-жылдын 4-ноябрында Бишкектеги «Hyatt Regency» мейманканасында КРнын Дин иштери боюнча мамлекеттик комиссиясынын 20 жылдыгына карата “Кыргыз Республикасынын дин саясатынын калыптанышы жана ишке ашырылышы: көйгөйлөрү жана келечеги”  деген темада конференция болуп өттү.

Иш-чарага КРнын Президенттик Аппаратынын, Кыргыз Өкмөтүнүн, КРнын Ички иштер министрлигинин  өкүлдөрү, дин иштери боюнча адистер жана медиа өкүлдөрү катышты.

Конференцияда КРнын Дин иштери боюнча мамлекеттик комиссиясы жөнүндө таанытуу фильми көрсөтүлдү. Бул тасма Кыргыз-Түрк “Манас” университетинин жетекчилигине караштуу Радио-телекөрсөтүү башкармалыгынын “Медиа Манас” чыгармачылык тобу тарабынан тартылган. Эки апта ичинде даярдалган 15 мүнөттүк таанытуу тасмасында Кыргызстандагы уюмдардын белгилүү өкүлдөрү менен болгон интервьюлар да камтылган. Аталган таанытуу фильми Кыргызстандагы башка теле каналдарда да көрсөтүлүп, жарыяланды.

Фильмди тартууда көрсөткөн колдоосу үчүн университеттин ректору, профессор Себахаттин Балжы, Биринчи проректор, профессор Асылбек Кулмырзаев жана “Медиа Манас” чыгармачыл тобуна КРнын Дин иштери боюнча мамлекеттик комиссиясы тарабынан ыраазычылык каты тапшырылды.

“Медиа Манас” Кыргызстандагы ар кандай уюм, мекеме жана ишканалар менен биргеликте кызматташуу аркылуу коомго үзгүлтүксүз колдоо көрсөтүү иштерин улантып, бир нече долбоорлорду ишке ашырып келе жатат.